預算案冇得「分享成果」 唯有「獨食蘋果」啦！

　　今日係林鄭政府發表第一份《財政預算案》嘅大日子，財爺陳茂波（波叔）一早講明派錢有難度，結果今年大家都係得「糖」可以嗒吓。唔知立法會主席梁君彥係唔係知道波叔派嘅「糖」唔係個個都有得食，所以今日就率先向記者派大大個「成果」，呀！唔係！係「蘋果」至啱！無獨有偶，今年嘅《財政預算案》封面都係好似蘋果咁「紅到透」，同特首林鄭份《施政報告》嘅藍色剛好係對比色。

上年分「柑」同味 今年獨食易肥

　　話說上年嘅《財政預算案》嗰日，主席都有請大家食生果，上年就係請大家食柑（金）！行家個個可以分「柑」同味！唉！Jenny都想要「金」多過「糖」呀！睇嚟主席都諗住「崩口人忌崩口碗」，今年同大家「分享成果」就算喇！不過主席，啲蘋果原隻上，仲要成隻手咁大，立會又冇刀仔畀大家分享「蘋果」，最後小妹同行家們就只好「獨食」啦⋯⋯

來自日本青森的大蘋果。